Piquinu
Un curtiu documental dirixíu por Sonia Fernández
Uviéu, 2012
Quien escriba "piquinu" en
cualquier buscador d'internet va tener la oportunidá d'averase a una pequeña
xoya. Van sali-y dos enllaces, un videu y un blog, que tienen entrambos un
mesmu protagonista: un curtiu documental filmáu en 2011 en Llena, que se titula
Piquinu,
y que colgaron na rede a finales del 2012. Cuenta un día na vida d'Aarón, un rapacín llenizu qu'estudia na
Pola pela selmana, pero que sube al pueblu los güelos tolos fines de selmana
que pue. Présta-y garrar los perros y caminar monte arriba, buscando la
tranquilidá de los espacios abiertos, l'aventura de tar consigo mesmu. Y eso ye
lo que cuenta esti curtiu de poco más de doce minutos, desque almuerza los
frisuelos que-y fai la güela Argentina
(vistida cola batina d'andar per casa), garra'l Chumbo, el so perru, y empieza
una subida que lu va llevar dende Rospaso a la Tena.
Los responsables del curtiu (guión
de Xesús Torga, dirección y
producción de Sonia Fernández
–conocida nel mundu de les artes plástiques– y un magníficu trabayu na
grabación, montaxe y música de Dani
Álvarez) acierten cuando ceden tol protagonismu al rapaz, limitándose a
poner n'imáxenes lo qu'Aarón contó, un añu enantes, nun concursu de cuentos que
convocara l'institutu de La Pola nel qu'estudia, y onde Torga y Fernández
trabayen como profesores.
Ye'l propiu Aarón quien relata la so
peripecia n'off. Una voz con acentu de Llena y un asturianu impecable, cásique máxicu,
que nun se cansa ún de sentir, va contando lo muncho que-y presta echase al
monte. La cámara limítase a siguir al rapaz nos sos movimientos de cada día,
pero construye un segundu relatu: la cocina de fierro apagada mientres la güela
tresna na de gas, la llarga mesa con hule, en penumbra, de cuando había más
xente en casa, una portiella fecha col metálicu d'una cama, un pueblu en
silenciu... Empieza entós la subida, narrando peripecies d'otres caminates: una
atopada con un osu, xabalinos, corcios, robezos... A lo primero va per un camín
de carru ente finques, depués más pel monte onde yá ye difícil siguir un
senderu, y per últimu ente la nieve, hasta tresponer la Tena y almirar un
paisaxe únicu y grandiosu énte'l qu'Aarón se siente "piquinu", dando
títulu al documental.
Esa ventana al mundu que ye internet asómanos
nesta ocasión a un paisaxe y a un paisanaxe que tenemos al llau de casa y que
de tan cerca cásique nos pasa desapercibíu. Aarón ye un rapaz como tantos otros,
pero observalu permite que nos déamos cuenta de la so estraordinaria
singularidá. La mirada que proponen los autores d'esti curtiu emociona na so
cenciellez, un llogru que namás s'algama, como dicía Clarice Lispector, con munchu trabayu.
No hay comentarios:
Publicar un comentario