Palabres
Grupu de Baille San Félix
de Candás
La Pola L.lena, 2014.
 |
| Palabres |
A
diferencia d’otres espresiones artístiques asturianes, como la música de gaita,
la tonada o la lliteratura, que nes últimes décades caminaron con bastante
fortuna hacia la modernización de les sos formes y llinguaxes, la danza
tradicional parecía marchar en dirección contraria, buscando afondar nesa
tradición bebiendo de les fontes orales tovía vives, procurando, como nel xuegu
del dominó, repetir y respetar. Lo que se ganó n’autenticidá, depués de la
cuestionable folclorización de los coros y dances del franquismu, perdióse
n’actualización, quedando les dances tradicionales nuna recreación etnográfica
brillante, na que los grupos competíen por una puesta n’escena cada vez más
tradicional: cásique resulta impensable un baille ensin el traxe asturianu d’a
primeros del sieglu XIX, que tampoco llogró nenguna actualización notable de la
mano del diseñu de moda.
Cásique
seis meses depués de la estrena que tuvo llugar en Candás el 8 de payares del
2013 tengo la oportunidá de ver l'espectáculu Palabres, una mui interesante
realización del Grupu de Baille San Félix, que llogró llevar a escena una idea
del escritor Xurde Fernández. Dos grandes pantalles ocupen l'escenariu del
Teatru Vital Aza de La Pola; per delantre d'elles hai unos llibros que decoren
el suelu del escenariu y un sofá, y per detrás d'eses pantalles muévense los
músicos: Mapi Quintana y Marcos García Alonso (autores de la banda sonora) y
Rubén Bada, Fernando Arias y Thomas Welvaadt. L'espectáculu, una reivindicación
esplícita y redundante de les llingües asturiana y gallego-asturiana, divídese
n'escenes, abriéndose cada una con una palabra ("Son",
"Alcordar", "Braña", "Fiesta"...) y la so definición
(dalgo llarga), a la que sigue la llectura d'un testu lliterariu (Xandru
Fernández lleó en vivu un fragmentu de la so novela Les ruines; mientres
qu'otres voces dieron forma a poemes d'Aurelio González Ovies, Pablo Texón,
Concha Quintana, Elías Veiga y Xosé Miguel Suárez). Mapi Quintana llevaba la
voz cantante y los componentes del Grupu San Félix, vistíos de negro a la moda
actual, poníen al serviciu del espectáculu'l so saber con bailles innovadores y
guapos, ensin dexar de beber na fonte de la tradición.
El
conxuntu, bien sorprendente, ye mui recomendable y merecía a estes altures
llevar delles decenes de representaciones. Ye un xuegu de lluces y sombres nel
que destaquen (na parte de les lluces) la idea, les músiques, la voz de Mapi
Quintana, la selección d'autores y testos, les coreografíes y lo audiovisual
(a cargu de Sr. Paraguas). Na parte de les sombres habría que poner la concepción
escénica. Ye verdá que les pantalles qu'ocupen l'escenariu dan munchu xuegu,
permitiendo reflexar nelles, como sombres chines, les mudances cásique
espresionistes que texen los cuerpos del grupu de baille, al que namás se-y
llega a ver les piernes per baxo la pantalla, na que se proxecta'l restu, o los
detalles qu'ofrez el realizador de los músicos y de la cantante, a los que solo
vemos en persona cuando salen a saludar. Saber que tán ende, detrás de la
pantalla, en directu, y tener que velos como si fuera una retresmisión parez la
opción menos atractiva d'una propuesta necesaria y llamativa.
No hay comentarios:
Publicar un comentario