SELMANA DE LES LLETRES ASTURIANES 2014

CÓMIC, IMAXE Y PALABRA

Un cuento viejo

     El 31 de marzu de 1889 editábase en Xixón el primer númberu de “La comedia gijonesa, periódico semanal festivo ilustrado”, que s’anunciaba na portada como fechu por Tarfe (testu) y Pepe (dibuxos). Na páxina 5 publicaba cuatro viñetes seriaes qu’ilustren “Un cuento viejo”: “Una vez era un rey,/ tenía tres fíes,/ vistióles de... colorao (ó azul)/ y tiróles al teyao.” El testu, n’asturianu, ye un cuentu mínimu que se conocía en munches partes d’España (recuéyelu Rodríguez Marín nos sos “Cantos populares españoles” de 1882), d’esos que se relaten a los nenos pequeños pa embromalos. Les cuatro viñetes escenificaben el cuentu con trazos eficaces y calidables, cola soltura habitual de Pepe Prendes, qu’ensiguida diba dexar l’oficiu de dibuxante satíricu pa convertise en dalgo serio: xuez. Teniendo en cuenta esi matiz colorísticu qu’introduz el testu (el “colorao o azul” nun figura en nenguna variante oral del cuentu popular), ye posible que la historieta pudiera llevar dalguna intencionalidá política. Cásique ensin proponéselu, Tarfe y Pepe Prendes taben echando a andar la historia del cómic n’asturianu.

Dibuxu d'Alfredo Truan

     Depués de Pepe Prendes, la combinación de dibuxu y testu n’asturianu parez que quedó reducida al chiste gráficu. Cuando, nos años setenta y ochenta del sieglu XX, la profesora Carmen Díaz Castañón publicaba les sos sucesives histories de la lliteratura bable, dedicaba un apartáu al cómic ensin dase cuenta de qu’esti xéneru necesita un desarrollu narrativu, esi “arte secuencial” que dicía Eisner cola economía de palabres que lu caracterizaba. Asina, Díaz Castañón namás destaca dos autores de chistes gráficos de posguerra: Alfonso Iglesias, el popular dibuxante de Pinón y Telva, y Rovés, el creador del Gaviotu, el personaxe playu. Díaz Castañón nun fai nenguna referencia al inicial Pepe Prendes, y escaez la notable collecha de dibuxantes humorísticos d’a primeros del sieglu XX, onde figuren nomes tan distinguíos como Truán, Valle o Milín, resalvando tamién los galanes que daba, agora sí, el cómic n’asturianu de la mano de Conceyu Bable (Ramón Fermín y Solís Santos).

Pinín y el madreñogiro, por Alfonso

     Alfonso ye la referencia histórica. Qu’empreste’l so nome al más importante certame de cómic convocáu n’Asturies pol Principáu, pa obres n’asturianu, ye la meyor manera de vincular yá pa siempre a esti dibuxante pa cola llingua asturiana. Ye verdá que nos sos trabayos, como un elementu caracterizador de los personaxes, Alfonso usaba espresiones asturianes (“Si vou, vou en bou, si nun vou en bou, nun vou” diz un pixuetu dibuxáu por él), pero toi seguru qu’a más d’ún tien que choca-y saber que les aventures de Pinín tienen n’asturianu poco más que’l títulu y dalguna pingarata de sabor local: hasta tal puntu los personaxes d’Alfonso tán integraos nel imaxinariu colectivu de los asturianos que cadún los incorpora na so llingua de referencia, ensin que pareza importar realmente la de creación orixinal.

     Esti arte, que llegó a tener figures asturianes de renome internacional (los hermanos De la Fuente, Isaac del Rivero fíu, Xuasús...), nun fexo otra cosa que consolidase usando la llingua del mediu que tocaba: español, asturianu, pero tamién francés o inglés. A los nomes que yá citamos habría qu’añadir los d’Adolfo García, Robert, Buylla, Quintana, Sergio Bances, Lucía Bande, Silvia Granda, Javier Rodríguez, Parissi, Frank, Alberto Álvarez Peña, Neto, Antonio Acebal, Enrique Carballeira, Ígor Medio (un autor qu’amerita que se-y dedique una Selmana de les Lletres)... Una nómina de dibuxantes imposible d’abarcar y que nun para de crecer, a veces arreyada a la prensa diaria que los acueye nes sos páxines, otres en publicaciones específiques (toes yá desaparecíes: Espolique, Tapón, El Wéndigo, El Llapiceru, El Gomeru, Cáctus Cómics...), y agora buscando abellugu nesi sacu ensin fondu que ye internet.

     Al cabu de 125 años parez oportunu celebrar esti aniversariu dedicando la 35 Selmana de les Lletres al cómic. Foi una pena que nun s’aprovechara pa publicar nun tomu los trabayos gallardonaos col premiu que’l mesmu Principáu convocaba pa historietes n’asturianu hai un cuartu de sieglu baxo’l nome “Urriellu”. Les seis o siete convocatories que se celebraron ente los ochenta y primeros de los noventa, y que nunca quedaron recoyíes en llibru, tienen ganadores de prestixu: Javier Marinas, Gaspar Meana (l’autor de la impagable “Crónica de Leodegundo”), Germán García... Dientro de los actos d’esta Selmana, el Principáu tuvo la feliz idea d’encargar un volume, “Dibuxando un camín”, a los ganadores de les cuatro convocatories del so Premiu Alfonso Iglesias, representantes del relevu xeneracional nel xéneru: cincuenta años separen el clasicismu d’Isaac del Rivero (Colunga, 1931), historia viva de la cultura asturiana qu’empezó a publicar de la mano del autor de Pinín, d’Alfonso Zapico (Blimea, 1981), el más internacional de los nuesos dibuxantes actuales. Los otros dos autores son Javier Marinas (Grau, 1967), colorista y de trazu llétricu, y Ruma Barbero (Somió, 1971) que, cola so capacidá de síntesis narrativa y la mirada comprometida y didáctica a la que nos tien avezaos, plantexa un verdaderu manifiestu xeneracional. Ruma termina la so colaboración con una declaración de principios sobre la llingua que facemos propia: “Yá eché la metá de la mio vida nesto, nun m’importa echar la otra metá”.